شادی کے باوجود رینا رائے کے ساتھ معاشقہ، شتروگھن سنہا کھل کر بول پڑے

(ممبئی ) فلمی دنیا کے مشہور اداکار شتروگھن سنہا نے شادی کے باوجود اداکارہ رینا رائے کے ساتھ معاشقے پر کھل کر بات کی ہے۔
حال ہی میں لہریں ریٹرو کو دیے گئے ایک انٹرویو میں شتروگھن سنہا نے اعتراف کیا کہ جب ان کی زندگی میں ان کی کو سٹار رینا رائے موجود تھیں تو انہوں نے اپنی اہلیہ پونم سنہا کے ساتھ بے وفائی کی تھی ۔ سینئر اداکار نے بغیر کسی کا نام لیے اپنی زندگی میں ہونے والی "غلطیوں” کا ذکر کیا اور اعتراف کیا کہ ان کے "لو ٹرائی اینگل” نے ان کی ذہنی صحت پر گہرا اثر ڈالا۔ انہوں نے کہا کہ صرف خواتین ہی نہیں بلکہ مرد بھی پیچیدہ تعلقات میں الجھ کر پریشان ہوتے ہیں۔
جب شتروگھن سنہا سے پوچھا گیا کہ وہ اپنی زندگی کے اس دور کو کیسے دیکھتے ہیں جب ان کی زندگی میں رینا رائے اور پونم دونوں موجود تھیں، تو انہوں نے کہا "میں کسی کا نام نہیں لوں گا۔ لیکن میں ان تمام خواتین کا شکر گزار ہوں جو میری زندگی کا حصہ رہیں۔ میرے دل میں کسی کے لیے کوئی گلہ نہیں ہے۔ میں کبھی کسی کے بارے میں برا نہیں سوچتا۔ انہوں نے مجھے بہتر انسان بننے میں مدد دی۔”
انہوں نے مزید کہا "جب ایک شخص دل کا اچھا ہو، اور ایک ہی وقت میں دو پرخلوص تعلقات میں ملوث ہو، تو وہ بھی ذہنی اور جسمانی طور پر بہت تکلیف اٹھاتا ہے۔ آپ کو گناہ کا احساس ہوتا ہے۔ جب آپ اپنے محبوب کے ساتھ ہوتے ہیں تو آپ کو گھر پر اپنی بیوی کے لیے برا لگتا ہے، اور جب آپ اپنی بیوی کے ساتھ ہوتے ہیں تو محبوبہ کے لیے برا محسوس ہوتا ہے۔ "
شتروگھن سنہا کا کہنا تھا "میں نے اپنی زندگی میں یقینی طور پر غلطیاں کی ہیں۔ ایک لڑکا جو پٹنہ سے آکر فلمی دنیا کی چمک دمک میں کھو جائے، اس کے لیے یہ فطری تھا۔ مجھے شہرت کو سنبھالنے کا طریقہ نہیں آتا تھا۔ لوگ ان سب چیزوں میں کھو جاتے ہیں۔ میرے پاس کوئی سرپرست نہیں تھا جو میری رہنمائی کرتا۔ تاہم، جب پونم میری زندگی میں آئیں، تو انہوں نے میری بہت مدد کی۔”
رینا رائے کے کردار پر بات کرتے ہوئے انہوں نے کہا "میں کسی کا نام نہیں لینا چاہتا، لیکن اس شخص کے ساتھ جو کچھ ہو رہا تھا، میں اس کا شکر گزار ہوں۔ مجھے ان سے بہت پیار ملا اور بہت کچھ سیکھنے کو ملا۔ میرے دل میں کوئی شکایت نہیں ہے۔”
این ڈی ٹی وی کے مطابق شتروگھن سنہا اور رینا رائے کی ملاقات 1976 کی فلم "کالی چرن” کے سیٹ پر ہوئی، اور وہ "ملاپ”، "سنگرام”، "ست سری اکال”، اور "چور ہو تو ایسا” جیسی فلموں میں ایک ساتھ نظر آئے۔ دونوں ایک دوسرے کے قریب آ گئے تھے، لیکن شتروگھن سنہا نے اپنی شادی پونم سنہا سے کرنے کا اعلان کر دیا۔ راجیو شکلا کے ساتھ ایک انٹرویو میں، انہوں نے اس فیصلے کی وجہ بتاتے ہوئے کہا تھا کہ زندگی میں کبھی کبھار ایسا وقت آتا ہے جب فیصلہ کرنا بہت مشکل ہوتا ہے۔ لیکن ایک بار جب فیصلہ ہو جائے، تو یہ ہمیشہ سب کے حق میں نہیں ہوتا۔